អង្គការ NASA រក​ឃើញ​សមាធាតុ​អំបិល​ជា​លើក​ដំបូង ក្នុង​អតីត​បឹង​មួយ​លើ​ភព​ព្រះអង្គារ

(បរទេស)៖ យានរ៉ូបូត Curiosity របស់ទីភ្នាក់ងារអវកាសអាមេរិក NASA ដែលកំពុងស្ថិតនៅលើផ្ទៃភពអង្គារ (Mars) បានប្រទះឃើញថ្មមានផ្ទុកសមាធាតុអំបិល នៅរណ្តៅអាចម៍ផ្កាយ Gale Crater ដែលជាអតីតបឹង ដ៏ធំមួយ។ របកគំហើញនេះអាចផ្តល់ជាតំរុយថា រណ្តៅ Gale គឺជាបឹងធ្លាប់ផ្ទុកទឹកប្រៃដែលប្រហែលជាអាច ទ្រទ្រង់ទម្រង់ជីវិតណាមួយបាន មិនខុសពីមហាសមុទ្រនានាលើផែនដីយើងឡើយ។ នេះបើតាមការដកស្រង់ ការផ្សាយ ចេញពីសារព័ត៌មាន Sputnik នៅថ្ងៃអង្គារ ទី០៨ ខែតុលា ឆ្នាំ២០១៩។

យោងតាមការវិភាគសមាសធាតុអំបិលក្នុងថ្មនោះ អាចមានអាយុកាលចន្លោះ ៣.៣-៣.៧ពាន់លានឆ្នាំ។ ខណៈកន្លងមកអ្នកវិទ្យាសាស្រ្តក៏ធ្លាប់បានរកឃើញភស្តុតាងនៃសមាសធាតុអំបិល នៅតាមតំបន់ដទៃទៀតលើ ផ្ទៃភពអង្គារនេះគឺជាលើកដំបូងបំផុត ដែលសមាសធាតុអំបិល ត្រូវបានប្រទះឃើញនៅក្នុងរណ្តៅ Gale។

អ្នកវិទ្យាសាស្រ្តមានការជឿជាក់ថា សមាសធាតុអំបិលនោះត្រូវបានបន្សល់ទុក ក្រោយបឹងទឹកប្រៃនៅក្នុងរណ្តៅ Gale ដែលប្រហែលជាមានផ្ទុកទម្រង់ជីវិតថែមទៀតនោះ បានហួតឡើងលើផ្ទៃអាកាស និងក្នុងដីកាលពីអំឡុង សម័យ Hesperian របស់ភពអង្គារ ជាពេលដែលសកម្មភាពភ្នំភ្លើង និងគ្រោះទឹកជំនន់សាហាវៗបានកើនឡើង យ៉ាងញឹកញាប់ រហូតនៅទីបញ្ចប់ប្រែក្លាយអាកាសធាតុរបស់ភពអង្គារ ទៅជាស្ងួតហួតហែងដូចរាល់ថ្ងៃតែម្តង។

គួរជម្រាបថា បឹងទឹកប្រៃនៅលើភពផែនដីយើងវិញ គឺសម្បូរទៅដោយទម្រង់ជីវិតតូចៗ ដែលជាហេតុធ្វើឲ្យអ្នក វិទ្យាសាស្រ្តជឿថា ពពួកបឹងប្រភេទនេះនៅលើភពអង្គារ ដែលធ្លាប់មានវត្តមានកាលពីរាប់លានឆ្នាំមុន អាចជាទីជម្រករបស់បាក់តេរី ឬមីក្រូសារពាង្គ កាយដទៃៗទៀត៕

You might also like More from author