ក្រោយស្ថានទូត​អាមេរិក​​ត្រូវមីស៊ីល​បីគ្រាប់​ធ្លាក់ចំ នាំ​ឲ្យ​មនុស្ស​រងរបួស​មួយ​ចំនួន ធ្វើ​ឲ្យ​ទំនាក់​ទំនង​រវាង​អុីរ៉ាក់ និង​អាមេរិក​កាន់តែ​តានតឹង

(វ៉ាស៊ីនតោន)៖ សារព័ត៌មានស្តីពីសព្វាវុធ Inside Defense ដែលមានមូលដ្ឋាននៅអាមេរិក បានរាយការណ៍ថា សហរដ្ឋអាមេរិកបានបញ្ឈប់រាល់ការផ្តល់សព្វាវុធទៅកាន់ប្រទេសអុីរ៉ាក់ ស្របពេលដែលរដ្ឋាភិបាលប្រទេសទាំងពីរ កំពុងតែបន្តមានភាពតានតឹងជាមួយគ្នា។ នេះបើតាមការដកស្រង់ការផ្សាយចេញពីសារព័ត៌មាន Sputnik នៅរសៀលថ្ងៃអង្គារ ទី២៨ ខែមករា ឆ្នាំ២០២០។

យោងតាមសេចក្តីរាយការណ៍នាដើមសប្តាហ៍នេះរបស់សារព័ត៌មាន Inside Defense ដែលផ្អែកលើប្រភពអ្នកនាំពាក្យកងទ័ពអាកាសរបស់អាមេរិក លោក ប្រ៊ីយ៉ាន ប្រេស្កិនស៍ (Brian Brackens) ការផ្អាកនោះរួមមានទាំងការផ្តល់ក្រុមយន្តហោះចម្បាំង F-16 ថ្មីផងដែរ ហើយក្រសួងការពារជាតិអាមេរិក នឹងសម្រេចបន្តការផ្តល់សព្វាវុធ នៅពេលដែលបរិយាកាសនៅក្នុងប្រទេសអុីរ៉ាក់ មើលទៅមានសុវត្ថិភាពគ្រប់គ្រាន់ឡើងវិញ ។

គួរជម្រាបថា កាលពីថ្ងៃអាទិត្យកន្លងទៅ មីស៊ីល ០៣គ្រាប់បានធ្លាក់ក្នុងបរិវេណស្ថានទូតអាមេរិក ប្រចាំនៅទីក្រុងបាកដាដ ហើយមីស៊ីលមួយគ្រាប់ត្រូវបានគេអះអាងថា បានត្រូវចំអាហារដ្ឋានរបស់ស្ថានទូត ដែលជាហេតុធ្វើឲ្យមនុស្សមួយចំនួនរងរបួស។

រីឯនាពេលកន្លងទៅ ក្នុងខែនេះ សភាអុីរ៉ាក់បានបោះឆ្នោតឲ្យបណ្តេញកងទ័ពបរទេសទាំងអស់​ចេញពីប្រទេសអុីរ៉ាក់ ដែលវាគឺជាការឆ្លើយតបចំពោះប្រតិបត្តិការវាយប្រហារ តាមផ្លូវអាកាសមួយរបស់ទីក្រុងវ៉ាស៊ីនតោននៅទីក្រុងបាកដាដ ដែលបានផ្តាច់ជីវិតមេកងជីវពលអុីរ៉ាក់ លោក អាប៊ូ ម៉ាហ៍ឌី មូហាន់ឌីស (Abu Mahdi Muhandis) និងមេកងកម្លាំងពិសេសេរបស់អុីរ៉ង់ លោក កាស្សិម សូឡៃមេនី (Qassem Soleimani) ខណៈបុគ្គលទាំងពីរនេះត្រូវអាមេរិកជឿថា មានជាប់ពាក់ព័ន្ធជាមួយការចូល អុកឡុកស្ថានទូតអាមេរិកនៅអុីរ៉ាក់។ ចំណែក ទីក្រុងវ៉ាស៊ីនតោនបានព្រមានដាក់ទណ្ឌកម្ម ប្រសិនបើអុីរ៉ាក់ហ៊ានបង្ខំឲ្យកងទ័ពអាមេរិកចេញពីប្រទេស៕

You might also like More from author