រដ្ឋាភិបាលឥណ្ឌា​ត្រៀម​ជម្លៀស​​ប្រជាជន​រាប់​សែន​នាក់​ទៀត ខណៈ​ព្យុះ​កំណាច Vayu កំពុង​សំដៅ​មក​រដ្ឋភាគខាងលិច!

(ញូដេលី)៖ ប្រជាជនប្រមាណ ៣០០,០០០នាក់ ដែលកំពុងរស់នៅតាមបណ្តាយឆ្នេរសមុទ្រនៃរដ្ឋ ហ្គូចារ៉ាត់ (Gujarat) និងដែនដីឌុយ (Diu) ភាគខាងលិចប្រទេសឥណ្ឌា កំពុងរៀបចំជម្លៀសខ្លួនចេញពីលំនៅឋានរបស់ពួកគេហើយ បន្ទាប់ពីអាជ្ញាធរបានប្រកាសឲ្យដឹងថា ព្យុះស៊ីក្លូនដែលមានល្បឿនខ្យល់បោកបក់ពី ១៤០-១៥០គីឡូម៉ែត្រក្នុងមួយម៉ោង កំពុងតែចល័តមកកាន់តំបន់នេះ។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាល្ងាចថ្ងៃពុធ ទី១២ ខែមិថុនា ឆ្នាំ២០១៩។

ព្យុះស៊ីក្លូនដែលមានឈ្មោះថា វ៉ាយុ (Vayu) ខាងលើនេះត្រូវបានអាជ្ញាធរឧតុនិយមឥណ្ឌាគណនាថាមានសន្ទុះវាយប្រហារខ្លាំង ហេតុដូច្នេះទើបប្រជាជនដែលងាយរងគ្រោះ ត្រូវតែភៀសខ្លួនទៅរកទីកន្លែងមានសុវត្ថិភាព ដែលស្ថិតនៅឆ្ងាយពីតំបន់ឆ្នេរសមុទ្រ។ អាជ្ញាធរឥណ្ឌាប្រចាំរដ្ឋ និងតំបន់ខាងលើនេះ បានត្រៀមជម្រកបណ្តោះអាសន្នប្រមាណ ៧០០កន្លែង ដើម្បីទទួលប្រជាជនទាំង ៣០០,០០០នាក់ខាងលើរួមជាមួយនឹងក្រុមសង្គ្រោះបន្ទាន់ប្រមាណ ៣៩ក្រុមមកពីក្រសួងស្ថាប័ននានាព្រមទាំងយោធាថែមទៀត។

គួរបញ្ជាក់ថា កាលពីខែឧសភាកន្លងទៅនេះ ព្យុះកំណាចមួយក៏បានវាយប្រហារប្រទេសឥណ្ឌាផងដែរទៅលើរដ្ឋភាគខាងកើតប្រទេសជាប់សមុទ្រប៊ឹងហ្គាល់ ដោយកាលណោះបានបណ្តាលឲ្យមនុស្សខ្ទង់ ៧០នាក់បាត់បង់ជីវិត និងបង្កឲ្យលំនៅឋានប្រជាជនរាប់ពាន់ខ្នងរងការបំផ្លិចបំផ្លាញ។ ដោយឡែកចំពោះមុខព្យុះកំណាចលើកនេះ អាជ្ញាធរឥណ្ឌាបានប្តេជ្ញាថា នឹងព្យាយាមការពារសុវត្ថិភាពប្រជាជនឲ្យដល់ទីបំផុត ដោយមិនបណ្តោយឲ្យមាននរណាម្នាក់រងគ្រោះដល់បាត់បង់ជីវិតនោះឡើយ៕

You might also like More from author