ចាប់​រថយន្ដ​បាកុង និង​ត្រាក់ទ័រ ៥គ្រឿង រួច​ដុត​បំផ្លាញ​ចោល នៅ​ខេត្ត​ពោធិ៍សាត់

(ពោធិ៍សាត់)៖ រយៈពេល ៣ថ្ងៃ កម្លាំងអាវុធហត្ថខេត្តពោធិ៍សាត់ សហការជាមួយកម្លាំងមូលដ្ឋានអាវុធហត្ថស្រុក ភ្នំក្រវាញ និងស្រុកវាលវែង ដឹកនាំដោយលោកវរសេនីយទោ ឡាយ វិទូ មេបញ្ជាការរងកងរាជអាវុធហត្ថខេត្ត នាថ្ងៃទី០៩-១០-១១ ខែកញ្ញា ឆ្នាំ២០១៩ បានបន្តប្រតិបត្តិការស្រាវជ្រាវ និងរកឃើញរថយន្តបាកុងចំនួន ៣គ្រឿង និងត្រាក់ទ័រចំនួន ២គ្រឿងទៀត។

ប្រតិបត្តិការរឹបអូសត្រាក់ទ័រ ២គ្រឿង ត្រូវបានធ្វើឡើងនាព្រឹកថ្ងៃទី០៩ ខែកញ្ញា ឆ្នាំ២០១៩ នៅចំណុចចំការ ដំឡូងមី ភូមិអង្គ្រង ឃុំសំរោង ស្រុកភ្នំក្រវាញ។ ដោយឡែករថយន្តបាកុង ១គ្រឿង ត្រូវបានធ្វើឡើងនាល្ងាច ថ្ងៃទី០៩ ខែកញ្ញា ឆ្នាំ២០១៩ នៅចំណុចភូមិចំការជ្រៃខាងត្បូង ឃុំអន្លង់រាប ស្រុកវាលវែង និងបន្តប្រតិបត្តិការដុត កម្ទេចចោលរថយន្តបាកុង១គ្រឿងទៀត នាព្រឹកថ្ងៃទី១០ ខែកញ្ញា ឆ្នាំ២០១៩ នៅចំណុចអូរដីខ្មៅ ស្ថិតក្នុងភូមិ ចំការជ្រៃខាងត្បូង ឃុំអន្លង់រាប ស្រុកវាលវែង។

នៅថ្ងៃទី១១ ខែកញ្ញា ឆ្នាំ២០១៩នេះវិញ កម្លាំងបានបន្តចុះប្រតិបត្តិការរឹបអូសរថយន្តបាកុង ១គ្រឿងទៀត យកមករក្សាទុក នៅមូលដ្ឋានអាវុធហត្ថស្រុកវាលវែង ដើម្បីបម្រើការបង្ក្រាបបទល្មើស ធនធានធម្មជាតិនាពេល ក្រោយ។

គួរបញ្ជាក់ថា ដើម្បីទប់ស្កាត់ និងបង្ក្រាបបទល្មើសធនធានធម្មជាតិ កម្លាំងអាវុធហត្ថខេត្ត បានសហការបើក ប្រតិបត្តិការស្រាវជ្រាវ និងរកឃើញរថយន្ដបាកុងជាមធ្យោបាយដឹកឈើជាច្រើនគ្រឿង ហើយត្រូវបានបំផ្លាញ ចោលនៅនឹងកន្លែង ដែលរថយន្តទាំងនោះត្រូវក្រុមឧក្រិដ្ឋជន យកទៅលាក់ទុក នៅក្នុងព្រៃយ៉ាងជ្រៅ ហើយទីតាំងខាងលើនេះ ត្រូវបានមន្ដ្រីអាវុធហត្ថបង្ហើបថា ជាតំបន់ក្ដៅនៃការប្រព្រឹត្តបទល្មើសព្រៃឈើ៕

(ប្រភបព Fresh News)

You might also like More from author