ONE Championship តែងតាំង​អតីតនារី​ជើងខ្លាំង​ពិភពលោក Miesha Tate ជាអនុប្រធានថ្មី

(ភ្នំពេញ)៖ ស្ថាប័នប្រដាល់ ONE Championship បានប្រកាសតែងតាំងអតីតម្ចាស់ខ្សែក្រវាត់ពិភពលោក Women’s Bantamweight Championship ផ្នែកប្រដាល់គុនចម្រុះ MMA នារីជើងខ្លាំង Miesha Tate ក្លាយជាអនុប្រធានប្រចាំ ស្ថាប័ន ONE Championship ដែលការតែងតាំងនេះ ធ្វើឡើងនាព្រឹកថ្ងៃព្រហស្បតិ៍ ទី៨ ខែវិច្ឆិកា ឆ្នាំ២០១៨។

លោក Chatri Sityodtong នាយកប្រតិបត្តិរបស់កម្មវិធីប្រដាល់ ONE Championship បានឲ្យដឹងថា វាពិតជាមានភាពប្រសើរខ្លាំងណាស់ ក្នុងការតែងតាំងអតីតកីឡាការិនីម្ចាស់ខ្សែក្រវាត់ពិភពលោក Miesha Tate ជាអនុប្រធានរបស់យើង។

Miesha ជាកីឡាការិនីសញ្ជាតិអាមេរិក វ័យ៣២ឆ្នាំ កាន់ខ្សែក្រវាត់ ដែលមានបទពិសោធន៍ច្រើនចាប់តាំងបានចូលប្រឡូកក្នុងវិស័យកីឡកាលពីឆ្នាំ២០០៥ និងបានឈ្នះជើងឯកតែម្តងនៅទីក្រុង Washington សហរដ្ឋអាមេរិក និងមានភាពលេចធ្លោក្នុងវិស័យកីឡាមួយនេះ ហើយបានចូលជាកីឡាការិនី MMA ក្នុងឆ្នាំ២០០៧ បានចូលនិវត្តន៍កាលពីឆ្នាំ២០១៦ ជាមួយនឹងកំណត់ត្រាលើសង្វៀន ២៥ដង ឈ្នះ១៨ដង និងចាញ់៧ដង។

Miesha អនុប្រធានថ្មី រូបនេះជាអតីតជើងឯកប្រដាល់ចម្រុះពិភពលោកដែលមានរហស្សនាម «Cupcake» គឺនារីជើងខ្លាំងម្នាក់ក្នុងកម្មវិធីប្រដាល់ MMA កម្រិតពិភពលោក នាងធ្លាប់ជ័យជម្នះគួរឲ្យចាប់អារម្មណ៍លើកីឡាការិនីជើងខ្លាំងជាច្រើនដូចជា Liz Carmouche, Sara McMann, Jessica Eye និង Holly Holm៕

You might also like More from author