អ្នកវិទ្យាសាស្ត្រ​​ងាក​ទៅ​ប្រើ​​កម្មវិធី Simulation ដើម្បី​ស្វែង​យល់​​លម្អិត​ពី​កំណើត​​ព្រះច័ន្ទ និង​​ភពនានា​​ក្នុង​ប្រព័ន្ធ​​ព្រះអាទិត្យ

(ឡុងដ៍)៖ ដោយសារតែអ្នកវិទ្យាសាស្រ្តមិនមានឱកាសមើលឃើញ ព្រឹត្តិការណ៍ប៉ះទង្គិចគ្នាធំៗនៅក្នុងប្រព័ន្ធព្រះអាទិត្យ ដូចជាពេលនៃការកកើតព្រះច័ន្ទរបស់ផែនដី វត្តមាននៃប្រព័ន្ធខ្សែក្រវាត់របស់ភពសៅរ៍ (Saturn) និងរង្វិលជុំប្លែកខុសឆ្ងាយពីគេនៃភពអុយរ៉ាណុសជាដើមនោះ អ្នកវិទ្យាសាស្រ្តបានងាកទៅប្រើប្រាស់ប្រព័ន្ធគំរូសេណារីយ៉ូ (Simulation) នៅលើកុំព្យូទ័រ ហើយខណៈដែលបច្ចេកវិទ្យាកុំព្យូទ័រ បន្តមានភាពរីកចម្រើនកាន់តែខ្លាំងទៀតនោះ គំរូ Simulation នៃព្រឹត្តិការណ៍អស្ចារ្យទាំងនេះ អាចកាន់មានលក្ខណៈលម្អិតច្បាស់ឡើងៗ។

ថ្មីៗនេះអ្នកវិទ្យាសាស្រ្តកំពុងសិក្សាទៅលើគំរូ Simulation នៃព្រឹត្តិការណ៍ប៉ះទង្គិចគ្នារវាងវត្ថុអវកាសដ៏ធំមួយ ជាមួយនិងភពអុយរ៉ាណុសកាលពីរាប់ពាន់លានឆ្នាំមុន ដែលបានបណ្តាលឲ្យអ័ក្សរង្វិលជុំរបស់ភពមួយនេះ មានសភាពចម្លែកខ្លាំងពីភពឯទៀតៗនៅក្នុងប្រព័ន្ធព្រះអាទិត្យ។ លើកលែងតែភពអុយរ៉ាណុស ភពដទៃទៀតមានអ័ក្សរង្វិលជុំបញ្ឈរត្រង់ស្មើ ឬក៏ទ្រេតតែប៉ុន្មានដឺក្រេប៉ុណ្ណោះ ប៉ុន្តែសម្រាប់វាវិញគឺមានអ័ក្សផ្តេកខ្លាំងខុសគេ។ លក្ខណៈចម្លែករបស់វាពុំទាន់អស់ត្រឹមនេះឡើយ ដោយភពអុយរ៉ាណុសក៏មានស្រទាប់ម៉ាញេទិចប្លែកហើយមានសីតុណ្ហត្រជាក់ខ្លាំងផងដែរ។

គួរជម្រាបថា តាមរយៈការប្រើប្រាស់ Simulation អ្នកវិទ្យាសាស្រ្ត អាចវាយតម្លៃលើលទ្ធផលខុសៗគ្នា នៃព្រឹត្តិការណ៍ខាងលើ ដោយពួកគេអាចកំណត់ទំហំ និងល្បឿននៃវត្ថុដែលបានបុកជាមួយអុយរ៉ាណុស ក៏ដូចជារង្វាស់មុំនៃការប៉ះទង្គិចគ្នា ហើយលើសពីនេះទៀត Simulation ក៏អាចបង្ហាញពីទំហំនៃខ្ទាតកម្ទេចកម្ទីរដែលបង្កឡើង ព្រមទាំងសមត្ថភាពអត់ធន់នៃបរិយាកាសរបស់ភព ក្នុងអំឡុងព្រឹត្តិការណ៍នេះផងដែរ។ ខណៈបច្ចេកវិទ្យាកុំព្យូទ័រកាន់តែជឿនលឿន ការប្រើ Simulation ទាំងនេះកាន់តែមានប្រសិទ្ធភាពឡើង៕

You might also like More from author